أول تاج...فى عز الصيام

التاج ده وصلنى من صديقتى العسوله منمن صاحبة مدونة My Hope$

وبصراه بصراحه..مع انه اول تاج الا انه كان مرهق جدا و اتعصرت فيه بجد

ماعلينا

نبدأ ببركة بسم الله ونجاوب على الاسئله

لو قالولك اختاري عصر من عصور مصرعلشان تعيشي فيه تختار اى عصر و فى عهد اى حاكم.. واشمعنى؟
لوقالولى كده...ممكن ساعتها يكون اختيارى اعيش فى العصر العباسى الاول أو عصر صلاح الدين وده لإنه أزهى عصور الفتره دى

وكمان كان فيه انتصارات وعزه كبيييره أوى
,,,,,,,,,
اول اولويه فى حياتك عيلتك ولا شغلك ولا اصحابك؟
أكيد لكل فئه من التلاته أثر كبيير فى حياتى بس لوقلنا ايه الاول ..اكيد هتبقى العيله لانها هى اللى اديتنى معانى وقيم من خلالها كونت جزء كبير من شخصيتى اللى بيها عرفت ازاى اصاحب ..وازاى اتعامل.. وازاى اشتغل
,,,,,,,,

ايه اكتر حاجه بتحبيها فى رمضان؟
اللمه ودفا العيله لما بتتجمع على سفره واحده مع بعض

و احساس الوحده الكبير لما كل المسلمين بيفطروا وقت واحد كلهم

وكمان الخير الكتير اللى الناس بتعمله فى رمضان ولما بشوف ده كله
بتمنى عمل الخير يكتر ويدوم

وبقول ساعتها...ياريت السنه كلها تبقى رمضان
,,,,,,,
اوصفى ليا اجمل فطار ممكن تفطريه؟
مفيش احلى من كوباية البلح على الفطار مع ناس ميكونش جامعنى معاهم غير صفاء النفس

وبالنسبه للاكل فساعتها أى حاجه ممكن تتاكل وخلاص

لان بجد فعلاالفطار بلمته مش بأكله
,,,,,,,,
لو انت حاكم على مجموعه من الافراد هتكون عادل..طب هتعمل ايه عشان تتأكد انك حاكم عادل؟

هحاول على قد مقدر أكون عادله فى توزيع الثروات كل على حسب مجهوده وعمله والغى كل الحاجات اللى ممكن تعطل مصالح الناس وتفسدها زى الروتين والكوسه وكل ماشابه ذلك من خضار فاسد ينبغى وضعه فى المكان الذى يليق به

اما بالنسبه انى هعرف ازاى فدى مشكله بجدلان ساعتها هيبقى فى كتيير ممكن ينافقونى ويتملقونى عشان أنا الريسه وبتاع

بس على العموم اكيد اثار العدل بتبان على الناس والمجتمع ككل

وبعدين كمان انا هحاول مخليش فى فرق بينى وبين الناس عشان اسمع مشاكلهم واعرفها على حقيقتها

يلا بقى ابقوا انتخبونى :)

,,,,,,,
اللى بيبوظ الحكام .. نفسهم؟ ولا الشعب؟ ولا الحاشيه المقربه؟

لكل فئه من التلاته دور

الحكام بجبروتهم واطماعهم وعزل نفسهم عن الشعب وعدم سماع مشاكلهم وحلها واسناد الامور ومصالح البلاد للحاشيه المقربه من وزراء أو أمراء فاسدين اللى بدورهم بيتملقوا الحكام ويصورولهم ان الحكايه ألسطه وتمام اوى ولا باظت ولاخربت

وييجى دور الشعب فى الاخر لما يسكت ويرضى بالخنوع والخضوع ليهم وعدم المطالبه بحقه ولاكانه عايش فى المكان ده اصلا

فبالتالى بتتطربق على دماغهم كلهم فى الاخررررر
,,,,
مين أكتر اعلامي مصري بتحترميه؟
منى الشاذلى وبرنامجها العاشره مساءا

والاستاذ مجدى الجلاد رئيس تحرير المصرى اليوم

والكاتب الجامد جدا يوسف معاطى
,,,,,,
قريتي ديوان عمر مصطفى صاحب بلوج تجربه " اسباب وجيهه للفرح" عن دار ملامح و لا لسه ؟؟ لو اه ايه رايك فيه؟؟
لأ ..مقريتوش
,,,,,
لو ممكن تشتغل شغلانه تانيه غير اللى انت بتشتغلها او كنت بتشتغلها كنت تتمنى تبقى ايه؟
هوه انا اصلا لسه مشتغلتش علشان اغير الشغلانه بتاعتى

لكن انا نفسى ان شاء الله اشتغل فى مهنة البحث عن المتاعب (اللذيذه)واللى هى الصحافه
قولوا اميييييين
,,,,,,,
ايه تانى بلد تتمنى تعيش فيها بعد مصر؟
أسبانيا
بحس فيها حنين غريب اوى

وكانى كنت عايشه فتره من وقتى هناك

مع انى اساسا مشفتهاش غير فى الصور:)
,,,,,,,,
اوصفي ليا ترتيبات اجمل فرح ممكن تحضرية؟
هوه الترتيبات والمكان والكلام ده مش اشكال خالص

اهم حاجه الناس اللى جايه تكون بتهنى من قلبها يعنى مش تقضيت واجب وخلاص

لأ..يكونوا جايين يفرحوا مع العروسين بصدق ويشاركوهم فرحتهم بحب
واهم حاجه بقى

البوفيه يكون مفتوح علشان الناس تاكل بمزاااااج:)
,,,,,,,
بتراعي كلام الناس والقيل والقال؟ لو اه او لا قولى ليه؟
اكيد طول منا عايشه مع ناس براعى وجهة نظرهم وبهتم بكلامهم طالما كان فى حدود الوسطيه ووجهة النظر البنائه أما لو الحكايه افورت واتقلب الموضوع لتدخل فى شئون خاصه أو نميمه

أو اى حاجه من دى فساعتها بيكون رد فعلى الوحيد هو
الــــــــتـــــــــنـــــــــــفـــــــــــــيــــــــــــــض
وكبر كبر ياعم الحج
,,,,,,,,,,,,,
صحيت من النوم ما لقيتش الموبايل ولا الكمبيوتر ولا الكاميرا الديجيتال ولقيتنا رجعنا لعصر الحمام الزاجل والحصنه هتكون سعيد؟
بصراحه انا مش عارفه أول احساس هيكون ايه لان ساعتها هكون بين احساسين
الفرح
لان مفيش احلى من الطبيعه النقيه اللى خلقها لنا ربنا من غير اضرار اشعاعيه ولا كلام من ده فهتكون العيشه بسيطه وجميله جدااا
والحزن
لان على قد ما الطبيعه بسيطه وساحره الا ان العيشه هتكون بدائيه جداااااوهنكون ساعتها فقدنا كل المخترعات الحديثه المهمه اللى كان ليها دور كبير فى حياتناومننكرش ان حاجه زى الموبايل او الكمبيوتر ساعدونا وسهلوا علينا حاجات كتيييره اوى
فمش عارفه بصراحه
بس المؤكد انى هحاول اتأقلم مع الوضع الجديد
,,,,,,
السعاده بالنسبه لك هى؟

الرضا عن نفسى وعن كل حاجه حصلتلى فى حياتى

,,,,,,,,

عندك امل ...اسبابك؟
الحمد لله عندى امل لان بالامل هنعيش ولو مفيش امل يبقى خلاص مبقتش تفرق سينا من سونيا واهى عيشه والسلام وهذا مالم اكن لأرضاه
,,,,,,,,,
لما تحب تهرب من كل شئ بتروح فين؟
هوه مش هروب بقدر مبيكون "اعادة نظر" وترتيب لبعض الامور اللى بتحصل

على العموم ساعتها بعمل حاجه ظريفه اوى

بقوم طالعه فوق على سطح بيتنا بين فترة العصر والمغرب وكل اللى بعمله هو البحلقه فى السما وبسسسس
لغاية مرسى على حاجه وبعدين بكمل اليوم عادى جدا
,,,,,
امتى أول مره خدت فيها نفس طويل كده وقلت بينك وبين نفسك يااااه الظاهر انا فعلا كبرت؟
أول مره حسيت بكده

كان من حوالى كام شهر لما اتحطيت فى موقف وكان على فيه ان اقرر بمفردى قرار من النوع المصيرى اللى على اساسه ممكن تتغير حياتى كلها

وبغض النظر عن الموقف وصحة القرار من خطأه الا انى ساعتها ولأول مره فى حياتى احس انى كبرت بما يكفى لاتخاذ القرارات بل وتحمل المسئوليه اللى ستنتج عنها

,,,,,,,,
لما بتعمل عمل خيرى بيكون ايه هو دافعك الاول؟
الترابط والتكافل الاجتماعى مع الناس وخصوصا لو كانوا مرضى او يتم او كبار فى السن مثلا

مجرد احساسهم انهم زينا زيهم ده بيفرق معاهم كتيير اوى
وطبعا ده بيكون بعد الدافع الأسمى وهوه ابتغاء مرضاة الله عز وجل
,,,,,,,,,
بتشرب سجاير؟ لو الاجابه اه ايه شعورك لو شفت ست بتشرب سجاير؟ وليه ؟
الحمد لله..محصليش القرف

اما عن احساسى فهو احساس بالقرف والاشمئزازسواء كان اللى بيشرب راجل او ست

لان الاضرار والمخاطر اللى فيها مش بتفرق بين نوع ونوع

كلهم فى المرض والمنظر المقرف سوااء
,,,,,,,,,,
بتعرف ايدك اليمين من الشمال ازاي؟
الموضوع ده كان بيمثللى مشكله عويصه زمان بس الحمد لله لقيت حل فيه وبقيت اعرفهم من بعض لما بكتب بخط حلو تبقى دى اليمين ولو العكس تبقى العكس
او مثلا لما بسلم على حد
وهكذااااااا
,,,,,,,,,
ايه اكتر اله موسيقيه بتحبها ؟
الجيتار....والناى.....والبيانو
,,,,,,,,
فى رأيك ليه الذوق والنخوه اتعدموا؟
هما ممكن يكونوا قلوا بس اتعدموا لأ

وده لسبب بسيط جدا

احنا مقبلناش الناس كلها عشان نحكم انهم قليلين الذوق او النخوه مثلا
على العموم
فى رايي انهم قلوا عشان طغيان الحياه الماديه والصراع الكبير على العيش ولقمة العيش فقل الذوق وحل محله (الدراع

وقلت النخوه وحل محلها(عيش ندل تموت مستور

,,,,,,,,,

ايه الحاجه اللى لو حصلتلك تبقى سعيد قوى؟؟؟
فى حاجات كتيره ممكن تخلينى سعيده
مثلا لما احس ان ربنا راضى عنى واكون راضيه عن نفسى والحاجات اللى بعملها

ولما برضو امشى خطوه فى تحقيق امنيه من امنياتى

ولما مصر تبقى احسن واحسن

ولما الخير اللى فى قلوب الناس يكتر اكتر

ونلاقى قلبنا على قلب بعض والانا دى تمشى بقى وتتبدل باحنا
ساعتها بجد

هكون سعيده جداا

,,,,,,,,

تختار يبقى عندك...ارض زراعيه ولا اجنس عربيات و لا كام عماره و لا فلوس فى البنك؟؟؟؟

ينفع الاربعه:)

لا بجداختار الارض الزراعيه لان فعلامفيش احلى من الخضره والهدوء والنقاء والطبيعه الجذابه
,,,,,,
البحر و لا النيل؟؟؟
البحر
برونقه وسحره الرائع
ووفاءه فى حمل الهموم وعدم البوح بها

,,,,,,
مركب ولا طياره؟

باخره:)

وياسلام بقى لو باخره فى وسط البحر
قمه فى الهدوء والروعه والجمال الطبيعى اللى من غير رتوش
,,,,,,,
انت مجنونه ولا عاقله؟
عاقله لدرجة الجنون

أومجنونه لدرجة العقل
,,,,,,,
تقرأ كتاب و لا تتفرج عليه فيلم؟
ياريت لو الاتنين
لان لكل منهما سحر خاص
فالكتاب بينمى ملكة التخيل والنظر للامور من وجهة نظر القارئ الخاصه
وده بيخللى فى استمتاع كبير بالمحتوى اللى فيه
وكذلك للفيلم سحره فى تشخيص الماده المقروءه وجعل الفرد حاسس انه عايش مع الممثلين لحظه بلحظه

غير كده وكده بيوصل وجهة نظر صناعه وده بيخلينا نعرف وجهات النظر المختلفه ومنقتصرش على رؤيتنا الشخصيه وبس
,,,,,,,
بتمرر التاج لمين؟
اهو ده اصعب سؤال فيهم كلهم:(

اصل بصراحه التاج ده تقيييل اوى وخايفه امرره لحد ليدعى عليه دعوه تستجاب فى شهر القبول

فانا من منبرى هذا بقول لكل اللى همرر لهم التاج
ربنا يعينكوا واوعووا تدعوا عليه الله يحفظكم
واستعدوا يا كل من
just letters
اعلاميين
مسلمه
للاجابه على هذا التاج

وكل تاج وانتوا طيبين وبكل خييييييير